Naglunsad og pag-atake ang Russia gamit ang usa ka grabe kusoga ug bag-ong hypersonic ballistic missile sa Kyiv, diin upat ka tawo ang nakalas. Kini na ang usa sa labing grabeng pagpamomba sa Russia sa rehiyon sa Kyiv sukad sa pagbuto sa gubat.
Giklasipika sa Amerika ang Oreshnik missile isip usa ka intermediate-range missile, nga may katakos sa pagdala og nagkalain-laing conventional o nuclear warheads. Ang kapaspas ug dagan (trajectory) niini hapit dili na mapugngan sa mga air defense systems nga anaa sa Ukraine.
Kini na ang ikatulong higayon nga gigamit sa Russia ang nahisgutang matang sa missile. Sumala kang Ukrainian President Volodymyr Zelensky, natagak ang missile duol sa siyudad sa Bila Tserkva sa central Ukraine. Gitawag ni Zelensky ang Russia nga wala na sa saktong panghuna-huna ug gipalig-on nga dili nila kini palampason o pasayloon.
Pipila ka mga lider sa kalibutan ang mikondena sa pag-atake sa Russia ngadto sa Ukraine, lakip na sila si European Union foreign affairs chief Kaja Kallas, French President Emmanuel Macron, ug German Chancellor Friedrich Merz, kinsa mipadangat sa dako nga suporta sa Germany alang sa Ukraine.
Nahitabo ang tibuok gabii nga pag-atake sa Kyiv human mimando si Russian President Vladimir Putin og panimalos tungod sa makamatay nga pag-atake sa Ukraine sa gi-okupang teritoryo sa Russia.
Photo courtesy: Sergey Dolzhenko/EPA
