Nagpagawas og pamahayag ang grupong Mayors for Good Governance (M4GG) may kalabotan sa kontrobersyal nga sige pag-absent ni Senador Ronald “Bato” dela Rosa sa Senado sulod sa pito ka bulan, sa wala pa kini mipakita pag-usab niadtong Mayo 14, 2026 aron mobotar sa pag-usab sa liderato sa Senado.
Sumala sa grupo, samtang nagdawat og hapit P300,000 matag bulan si dela Rosa, gibana-bana nga miabot na sa P2.1 milyon ang iyang nadawat nga suholan taliwala sa iyang pag-absent.
Gihisgotan sa mga mayor nga sa mga ordinaryong mamumuo, nagsumikad ang prinsipyo nga “no work, no pay”, ug ang ingon niini nga matang sa pag-absent, segurado nga moresulta sa suspension o pagkatanggal sa trabaho.
Alang kanila, dako nga insulto sa katawhan ang padayong pagdawat og suholan sa usa ka piniling opisyal nga wala nagtuman sa iyang katungdanan, ilabi na nga adlaw-adlaw nga nag-atubang ang mga Pilipino sa kalisod, taas nga presyo sa mga palitonon, ug krisis sa panginabuhi.
Nanawagan ang grupo sa mga senador nga dili himuong tagoanan sa absenteeism ang Senado ug dili panalipdan ang mga opisyal nga naglikay sa ilang responsibilidad.
Giduso sa grupo, ang mga magbabalaod mismo ang angay mangulo sa pagsunod sa balaod ug mobarog sa diwa sa tulubagon, integridad, ug kaayohan sa tibuok katawhang Pilipino.
Photo courtesy: Mayors for Good Governance/ Facebook
