Gisunog sa mga residente ang pipila ka tents sa usa ka ospital sa Democratic Republic of the Congo tungod sa pagkamatay sa usa ka batan-ong lalaki nga gituohang tungod sa virus nga Ebola. Sumala sa mga otoridad, wala tugoti ang pamilya sa pagkuha sa patayng lawas alang sa lubong aron malikayan ang posibleng pagkaylap sa virus.
Giingon sa mga saksi nga gilabay og bato sa mga tawo ang maong pasilidad ug gisunog ang isolation tents sa Rwampara General Hospital diin gitambalan ang mga pasyente sa Ebola. Napugos usab ang kapulisan sa pagpabuto og warning shots aron mapakalma ang kagubot.
Matod sa mga opisyal, daghang residente sa lugar ang wala motuo nga tinuod ang Ebola ug nagtuo nga gihimo lamang kini sa mga ospital ug NGOs aron makakwarta. Gikataho usab nga usa ka iladong football player sa komunidad ang namatay, ug ang iyang inahan nagtuo nga typhoid fever ug dili Ebola ang hinungdan sa iyang kamatayon.
Sa bag-ong datos sa World Health Organization, kapin 130 ka tawo na ang namatay tungod sa Ebola sa nasud sa Congo. Na-detect usab ang duha ka kaso sa nasud sa Uganda, hinungdan nga temporaryong gipahunong sa mga otoridad ang biyahe sa pampublikong transportasyon tabok sa border.
Photo Courtesy: Lokmat Times
