Gikatakdang ipahigayon ang labing dako nga Mindanao Housing Fair sa Pag-IBIG Fund karong umaabot nga Hunyo 9 ug 10, 2026, sugod sa alas-8 sa buntag didto sa KCC Convention and Events Center, Jose Catolico Senior Avenue, General Santos City.
Sumala sa pamahayag sa Pag-IBIG Fund General Santos City, ang dakbayan ang napili nga opisyal nga host alang sa ikatulo nga leg sa nasudnong housing fair, human sa malampusong pagpahigayon niini didto sa Luzon ug Visayas. Tumong sa kalihokan nga mapadali ug mapaduol sa mga miyembro sa Mindanao ang mga programa sa pabalay sa gobyerno.
Gilauman nga kapin sa 20,000 ka housing units gikan sa nagkalain-laing partner developers ang mamahimong kapilian sa mga motambong sa maong duha ka adlaw nga okasyon. Aduna usab ipahigayon nga on-site housing consultations ug dinalian nga pagproseso sa mga aplikasyon sa loan.
Lakip sa mga dagkong pribilehiyo nga tanyag sa maong fair mao ang mga housing units nga adunay binuwan nga bayranan nga magsugod sa ₱2,500, inubanan sa ubos nga 3% subsidized interest rate alang sa unang lima ka tuig sa loan term alang sa mga kwalipikadong miyembro.
Photo Courtesy: Philippine News Agency
