Temporaryong gi-freeze sa Financial Intelligence Unit sa Mexico ang mga bank account ni Sinaloa Governor Rubén Rocha Moya, apil ang accounts sa iyang mga anak ug pipila ka senior officials sa iyang administrasyon.
Ang maong lakang gisunod human sa pagpasaka og federal charges sa Estados Unidos niadtong Abril batok kang Rocha Moya ug ubang opisyal nga giakusahan og koneksyon sa Sinaloa Cartel.
Sumala sa U.S. Department of Justice sa Southern District of New York, giingong nalambigit ang mga opisyal sa drug trafficking, ilegal nga armas, ug pagdawat og milyon ka dolyares isip bayad kapalit sa pagprotekta sa “Los Chapitos” faction sa cartel.
Gikumpirma ni Mexican President Claudia Sheinbaum ang pag-freeze sa mga account apan gipasabot nga wala pa kini nagpasabot nga napamatud-an na ang sala sa mga giakusahan. Matod niya, automatic ug technical procedure lamang kini nga gihimo sa mga bangko ug Financial Intelligence Unit human sa pag-isyu og arrest warrants sa American authorities.
Photo Courtesy:EL PAI
