Posibleng mosaka og gamay ang presyo sa pipila ka batakang palaliton human gipadayag sa Department of Trade and Industry o DTI, nga nagpadayon ang pagsaka sa gasto sa krudo ug logistics tungod sa nagpadayong tensyon sa Middle East.
Sumala ni Trade Secretary Cristina Roque, kapin 68 porsyento sa mga produktong ilang gimonitor nagpabiling stable ang presyo bisan pa sa nagkataas nga operational expenses. Apan adunay pipila ka produkto nga posible nga adunay gamay nga price increase sama sa sardinas, canned meat products, pipila ka processed milk items, ug instant noodles.
Gipasabot usab sa DTI nga ang posibleng pagsaka sa presyo mas nakaapekto lamang sa pipila ka brands ug stock keeping units o SKUs, ug dili sa tibuok kategoriya sa produkto. Matud pa ni Roque, usa sa dakong hinungdan sa paghangyo og price adjustment sa mga manufacturers sa sardinas mao ang pagsaka sa presyo sa krudo nga gigamit sa pagpangisda ug transportasyon sa mga produkto.
Samtang padayon ang pagrepaso sa mga petisyon sa manufacturers, gipasiguro sa DTI nga igo gihapon ang supply sa mga batakang palaliton ug gipahimangnoan ang publiko nga likayan ang panic buying.
Photo Courtesy: Justdial
