Gitubag na sa Department of Energy (DOE) ang reklamo ug hangyo sa lokal nga kagamhanan sa Valencia City kalabot sa nagpadayong problema sa kanunay ug tag-as nga pagkapalong sa kuryente (power interruptions) sa dakbayan ug sa mga kasilinganang lugar nga giserbisyohan sa First Bukidnon Electric Cooperative, Inc.
Pinaagi sa usa ka opisyal nga sulat gikan kang Director IV Luningning G. Baltazar sa Electric Power Industry Management Bureau sa DOE, pormal nga gipahibalo si Vice Mayor Greizl Galario-Fernandez nga giaksyonan na sa nasudnong ahensya ang Valencia City SP Resolution No. 294-2025.
Ang maong resolusyon hugot nga nag-awhag sa DOE nga mopahigayon og dinalian ug lawom nga imbestigasyon kabahin sa sunod-sunod nga brownout sa mga lugar nga sakop sa serbisyo sa FIBECO.
Gipasiugda sa DOE nga ilang giila ug gisuportahan ang tinguha sa Sangguniang Panlungsod nga masiguro nga ang mga konstituente sa Valencia makatagamtam og lig-on, luwas, ug igo nga suplay sa kuryente.
Isip dinaliang lakang, opisyal nang gipadala sa DOE ang maong resolusyon ngadto sa National Electrification Administration (NEA) ug sa pamunuan sa FIBECO alang sa tukmang ug agarang aksyon
Gipasabot sa lokal nga kagamhanan nga ang lig-on ug kasaligan nga suplay sa kuryente mahinungdanon alang sa padayon nga kalamboan ug pagtubo sa ekonomiya sa siyudad.
Photo Courtesy: LGU – Valencia City
