Gisaulog sa lokal nga kagamhanan sa Dakbayan sa Malaybalay ang ika-81 nga Adlaw sa Kagawasan sa Malaybalay ug gipasidunggan ang mga beterano sa Ikaduhang Gubat sa Kalibutan sa Kampo Kasisang, Barangay Casisang, niadtong Mayo 20, 2026.
Naghatag ug pasidungog ang maong kalihokan sa kaisog ug sakripisyo sa mga sundalong Pilipino ug kaalyado nga nakigbugno para sa kagawasan sa nasod sa panahon sa Ikaduhang Gubat sa Kalibutan.
Mitambong sa maong kalihokan ang mga opisyal sa dakbayan ug barangay, mga beterano, mga unipormadong personahe, mga hawas sa kabatan-onan, ug mga ulo sa departamento.
Naglakip sa programa ang paghalad ug buwak (wreath laying), 21-gun salute ug taps gikan sa 1003rd Community Defense Center, ug mga mensahe nga nagpasidungog sa mga bayani sa kagawasan sa Malaybalay.
Gipaambit ni Vet. MSG Danilo P. Pedroso ang kasaysayan ug kamahinungdanon sa kagawasan sa Malaybalay, samtang gipasabot ni Hon. Jay Warren R. Pabillaran, Mayor sa Dakbayan, ang kamahinungdanon sa paghinumdom sa mga sakripisyo sa mga beterano sa gubat ug ang pagpadayon sa ilang kabilin nga nasyonalismo, paghiusa, ug serbisyo.
Gipadangat ni Col Warren C Munda INF (MNSA) PA, 403RD Deputy Brigade Commander ang mensahe sa pagsuporta ni BGEN Seigfred C. Tubalado PA, Brigade Commander sa 403rd Brigade, nga naghatag ug gibug-aton sa paghiusa ug nasyonalismo sa pagpalambo sa nasod
Nagsilbing pahinumdom ang maong okasyon sa kasamtangang henerasyon nga hatagan ug bili ang kagawasan, kalinaw, ug nasyonalismo samtang nagpasidungog sa mga bayani nga nakigbisog para sa kagawasan sa nasod
Photo Courtesy:City Government of Malaybalay
