Nagpahimangno ang World Health Organization nga posibleng moabot pa og unom hangtod siyam ka bulan ayha maandam ang bakuna batok sa kasamtangang klase sa Ebola virus nga mitumaw sa Africa. Sumala sa WHO, duha ka posibleng bakuna ang ginahimo batok sa Bundibugyo species sa Ebola apan wala pa kini masulayi pinaagi sa clinical trials.
Matod ni Tedros Adhanom, Director-General sa World Health Organization, niabot na sa kapin 600 ka gidudahang kaso sa Ebola ug 139 ka giingong namatay tungod sa sakit. Sa pagkakaron, 51 ka kaso na ang nakumpirma sa Democratic Republic of the Congo ug duha usab sa silingang nasud sa Uganda. Usa sa duha ka pasyente sa Uganda namatay nga matud pa gikan sa Congo.
Bisan og gideklarar sa WHO ang outbreak isip public health emergency of international concern, giingon niini nga wala pa kini giisip nga pandemic.
Lisod ang kahimtang karon sa mga health workers sa eastern Congo tungod sa kadaghan sa pasyente ug kakulang sa proteksyon. Gikabutyag nga ang Bundibugyo species sa Ebola virus talagsa ra motumaw ug wala pay aprubadong bakuna o tambal batok niini, maong mas lisod pugngan ang pagkatap sa sakit.
Photo Courtesy: AP news
