Giklaro sa Department of Education (DepEd) General Santos Division ang bag-ong pamaagi sa pagdumala sa mga kalihokan sa tunghaan ubos sa three term school year pinaagi sa pagbahin niini sa duha ka aspeto: ang Instructional Block ug ang End-of-Term Block. Ubos sa Instructional Block, hugot nga gipatuman nga wala na’y tugotan nga mga co-curricular o extra-curricular activities nga makabalda sa regular nga klase sa mga bata. Kung aduna ma’y mga kalihokan, kinahanglan kini nga i-integrate o isalipod isip kabahin sa leksyon o produkto sa mao nga subject area.
Sumala ni Kenneth Carisma Program Supervisor sa ahensya, kini nga lakang gihimo sa DepEd human nakita base sa mga milabay nga school years (sama sa SY 2024-2025) nga daghang mga adlaw sa ting-skwela ang nawala tungod sa tibuok adlaw nga mga selebrasyon. Lakip sa mga pananglitan niini mao ang Nutrition Month sa Hulyo ug Buwan ng Wika sa Agosto, diin ang tibuok adlaw nagahin na lang sa mga parada, poster-making, slogan-making, awit isahan, ug uban pang kompetisyon nga moresulta sa pagkasuspende sa in-person classes. Aron malikayan kini, ang mga kompetisyon sama sa poster ug slogan-making mahimo na lang nga himuong output o proyekto sulod mismo sa klase sa maong subject (sama sa Filipino alang sa Buwan ng Wika).
Samtang, ang mga dagko ug bulag nga kalihokan ipahigayon na lamang unha sa gitakda nga End-of-Term Block. Kini nga block naglangkob sa duha ka semana o napulo (10) ka adlaw nga gihatag human sa matag term para sa maong katuyoan. Dinhi na pwede ipahigayon ang mga co-curricular ug extra-curricular activities, division competitions, mga seminar ug training sa mga kagamhanan o magtutudlo, pag-compute sa grado sa mga bata, ingon man ang mga remedial ug enrichment classes, depende sa prayoridad ug panginahanglanon sa matag tunghaan.
