Pormal nang giduso ni Senador Erwin Tulfo sa Senado ang usa ka sugyot nga balaod nga nagtumong nga mahimong libre ang bayad sa mga professional licensure examinations sa nasud aron matabangan ang mga kabus nga fresh graduates.
Gisugyot ni Tulfo ang Senate Bill No. 2035 o mas nailhan isip Free Professional Examinations Act. Matod pa sa senador, nakalatid sa Konstitusyon nga kinahanglan hatagan og taas nga prayoridad sa Kongreso ang pagpasa og mga balaod nga makatabang ug makapaayo sa katungod sa mga Pilipino.
Gipasiugda niya nga importante nga adunay akses ang mga nakahuman sa ilang pag-eskwela sa mga professional board exams aron opisyal silang makatampo sa kalamboan sa nasud, apan daghan ang dili makaabot niini tungod sa kakuwang sa kwarta alang sa examination fees.
Ubos sa Section 4 sa maong sugyot, aron makapahimulos sa libreng eksaminasyon, kinahanglan lamang nga makakuha ang examinee og sertipikasyon gikan sa Department of Social Welfare and Development o DSWD nga mopamatuod nga sila kwalipikadong indigent o kabahin sa mga kabus nga pamilya.
Ang maong dokumento mao ang ipakita sa Professional Regulation Commission o PRC ug Civil Service Commission o CSC aron dili na sila pagabayron sa examination fees.
Gipasabot usab sa sugyot nga ang pag-avail sa maong pribilehiyo limitado lamang sa usa ka beses matag tuig aron masiguro ang patas ug hapsay nga implementasyon niini.
Photo Courtesy: Business Mirror
