Nipalugway sa ilang winning streak ngadto sa upat ka sunod nga kadaugan ang Cebu Greats human gipildi ang Zamboanga Sikat, 96-77, sa Maharlika Pilipinas Basketball League o MPBL 2026 Season didto sa Caloocan Sports Complex.
Misaka sa 6-2 nga rekord ang Cebu uban sa liderato nila ni Dondon Hontiveros ug Brian Heruela. Bisan og napildi sa sayong bahin, 27-24, mibutho ang Cebu sa 14-0 run nga gisugdan ni Hontiveros pinaagi sa sunod-sunod nga three-point shots aron ilisan ang dagan sa duwa ug makakuha og 38-27 abante sa second quarter.
Padayon nga mikontrolar ang Greats pinaagi sa balanse nga opensa, diin nakatampo si Ron Dennison ug Jonathan Ralf Gesalem sa matag duha ka tres aron mapadako ang labaw batok sa Zamboanga.
Nanguna sa Cebu si Mark Meneses nga adunay 19 puntos, 11 rebounds ug duha ka steals, lakip ang makusog nga one-handed slam dunk. Midugang si Wowie Escosio og 15 puntos ug lima ka rebounds, samtang si Paul Desiderio nakahatag og 13 puntos.
Nakuha ni Heruela ang “Best Player of the Game” human makahimo og 15 assists, pito ka rebounds ug duha ka steals bisan upat lamang iyang puntos. Si Hontiveros usab nakatampo og pito ka puntos, tulo ka rebounds ug tulo ka assists, samtang ang iyang anak nga si Ice Hontiveros nakadugang og pito ka puntos.
Photo Courtesy: CDN DIGITAL
