Usa ka talagsaon nga panghitabo sa kaminyoon ang narekord human ang bride nakatala og bag-ong Guinness World Record pinaagi sa pagbaton og 168 ka mga abay (bridesmaids) sa iyang kasal. Kasagarang labad sa ulo kung kaslon ang pagpili og abay, ilabi na kung dako ang cirle sa pamilya ug mga higala, apan lahi ang gihimo ni Tina Ackles nga taga-Killeen, Texas, human niya gidala ang tibuok niyang kaila ngadto sa altar sa iyang kasal didto sa Safety Harbor Resort sa Tampa Bay, Florida, human sa 12 ka tuig nga pakigrelasyon sa iyang groom.
Si Ackles usa ka aktibong miyembro sa American Business Women’s Association (ABWA) sukad pa niadtong 1999, ug sulod sa pipila ka tuig, daghan sa iyang mga “sister” sa maong asosasyon ang mipadayag nga gusto silang mag-abay kung moabot na ang adlaw sa iyang kasal.
Pinaagi sa usa ka group chat sa ABWA, pormal nga gipahibalo ni Tina ang petsa sa kasal aron mahatagan og igong panahon ang mga abay sa pagpangandam ug pag-coordinate sa ilang mga sinina, sapatos, ug aksesorya. Lakip na sa gustong mag- abay mao ang iyang mga igsoon, duha ka ig-agaw, usa ka pag-umangkon, ug ang iyang suod nga higala nga si Valerie nga nagsilbing maid of honour, samtang duna pay laing 180 ka mga dinapit ang mitambong sa seremonyas.
Giangkon ni Ackles nga wala niya giplano sa sinugdanan ang pagkuha og ingon ka daghang abay, apan nausab ang iyang hunahuna sa dihang gipahibalo siya sa usa ka miyembro mahitungod sa maong rekord sa kalibutan, ug dako ang iyang pasalamat tungod kay nahimong sayon ug hapsay ang dagan sa seremonyas tungod kay kasagaran sa mga miyembro duna may “Type A personality” kun mga organisado ug daling kaestorya.
Apan matod niya, ang pinakalisod nga bahin mao ang dokumentasyon alang sa Guinness World Records diin kinahanglan pa silang mokuha og mga opisyal nga counters nga gilangkuban sa mayor ug konsehal sa Safety Harbor, uban sa post commander sa American Legion sanglit aduna kini taas nga eksperensya isip magtiayon.
Human sa seremonyas, gisaulog sa bag-ong magtiayon ug sa daghang mga bisita ang kalampusan pinaagi sa usa ka panihapon nga gipaambit usab sa social media, diin gipahayag ni Ackles ang iyang dakong kalipay ug katingala tungod kay bisan pa man nga ganahan siya og mga dagkong kalihokan, wala gyud niya magdahom nga siya mismo ang makakuha og dungog sa Guinness World Record.
Photo Courtesy: Guinness Book World Record
