92 ka coordinators ang gipahalipayan, atol sa Fellowship ug Awarding Ceremony sa duha ka cluster nga mao ang Poblacion Malaybalay ug Northern Malaybalay Cluster. Ang maong okasyon gipangunahan ni sir Richard Soriano Villaronte ang Founder and Chairman sa Juander Radyo Loyalista Incorporated, inabagan sa Network Special Project Head ma’am Ruby Burlaos, nga gipahigayon sa Brgy. 1, Claro M. Recto Street, Malaybalay City, karong adlawa Mayo 21, 2026.
Nagkatigom ang mga miyembro sa duha ka cluster, aron sa pagsaulog sa ilang kalampusan isip pag-ila sa dedikasyon ug matinud-anong serbisyo sa organisasyon. Sa Poblacion Malaybalay Cluster, 18 ka coordinators ang nakadawat og pasidungog alang sa ilang napulo ka tuig nga serbisyo, samtang 46 usab ang giila tungod sa kapin lima ka tuig nga pagserbisyo. Adunay kinatibuk-ang 87 ka aktibong coordinators ang maong cluster nga gipangulohan ni Mr.Romulo Jamisola.
Samtang sa Northern Malaybalay Cluster, 5 ka coordinators ang gipasidunggan alang sa ilang napulo ka tuig nga serbisyo ug 23 usab ka coordinator alang sa kapin lima ka tuig nga pagserbisyo. Ang maong cluster adunay 28 ka aktibong coordinators nga gipangulohan ni Mr. Doming Ravidas.
Ang maong awarding ceremony dili lamang paghatag og award kundili usa usab ka paagi sa pagpalig-on sa relasyon ug kooperasyon sa matag miyembro. Gilauman usab nga magpadayon ang pagtinabangay ug maayong pagserbisyo alang sa kaayohan sulod sa organisasyon.
