Tulo ang patay sa usa ka pagpamusil sa usa ka mosque complex sa San Diego, California, samtang duha ka suspek nga tin-edyer nakaplagang patay usab sulod sa sakyanan tungod sa self-inflicted gunshot wounds, sumala sa kapolisan.
Giingon sa San Diego Police nga ang mga biktima nadiskubre sa gawas sa Islamic Center of San Diego, nga giilang pinakadako nga mosque sa maong distrito. Hapit tulo ka minuto human madawat ang report sa active shooter, niabot dayon ang mga pulis ug nakita ang tulo ka patay nga biktima sa gawas sa mosque.
Human niini, nakit-an usab ang sakyanan sa duol nga lugar diin sulod niini ang duha ka suspek nga nag edad og 19 ug 17, ug giingong nagpusil sa ilang kaugalingon. Wala’y pulis nga nakapabuto sa operasyon, sumala sa otoridad.
Giimbestigahan sa kapolisan ang insidente isip posibleng hate crime tungod sa mga natala nga hate-related rhetoric. Ang usa sa mga biktima giila nga security guard sa mosque nga giingong nakatabang paglikay sa mas grabe pa unta nga kadaot.
Matod sa imam, nga luwas ang mga staff, magtutudlo ug mga bata nga naa sulod sa compound sa panahon sa insidente, ug nagpahayag og simpatiya ug pakighiusa sa mga pamilya sa mga biktima.
Gikondenar usab sa mga opisyal ang pag-atake sa usa ka sagradong lugar, samtang nagpadayon ang imbestigasyon sa motibo ug tibuok panghitabo.
Photo Courtesy: PBS
