Gibutyag ni Pangulong Ferdinand Marcos Jr. nga nabalaka ang gobyerno sa posibleng “stagflation” sa nasud tungod sa padayong pagsaka sa presyo sa lana ug epekto sa supply chain disruptions nga misamot human sa tensyon tali sa Estados Unidos, Israel, ug Iran.
Matod sa presidente, ang stagflation mao ang sitwasyon diin naghinay ang pagtubo sa ekonomiya samtang nagpadayon ang pagsaka sa inflation o presyo sa mga palaliton.
Giingon niya nga padayon ang paningkamot sa administrasyon sa pagpugong sa inflation, ilabi na sa presyo sa pagkaon nga dako’g bahin sa adlaw-adlaw nga gasto sa mga Pilipino.
Bisan pa sa global oil price shock, giingon ni Marcos nga limitado ang mahimo sa gobyerno sa pagpugong sa import-driven inflation, apan makapokus kini sa pagkontrol sa presyo sa pagkaon ug batakang panginahanglanon.
Niagi, nagpatuman ang gobyerno og price cap sa imported rice aron makunhoran ang epekto sa pagsaka sa inflation nga miabot sa 7.2 porsyento niadtong Abril, samtang mihinay usab ang economic growth sa unang quarter sa 2026.
Giingon usab sa presidente nga nagpadayon ang ayuda ug mga transport subsidy programs, apan giila nga naapektohan ang mga suppliers ug producers, maong adunay hangyo sa pag-adjust sa presyo sa ubang non-essential food items.
Samtang, gimando usab ni Marcos ang pagkunhod sa dili moubos sa 10 porsyento sa operating expenses sa mga ahensya sa gobyerno aron mapalig-on ang fiscal management.
Bisan pa sa mga hagit, nagpabilin siyang positibo nga mosaka ang ekonomiya sa sunod nga mga bulan tungod sa padayon nga interes sa mga mamumuhunan ug suporta sa micro, small and medium enterprises (MSMEs).
Photo Courtesy: Manila Standard
