Kalangan nga pag-release sa mga dokumento ug ang wala pagtuman sa saktong prescribed time nga nakalatid sa Citizens Charter ang nag-unang mulo nga nadawat sa buhatan sa Anti-Red Tape Committee (ARTC) sa General Santos City.
Gipatin-aw ni Rhesababes G. Sumalpong, CPA, nga sakop sa komite, nga nagkalain-lain ang gigikanan sa mga nadawat nilang feedback ug reklamo. Gawas sa mga direktang gina-refer gikan mismo sa nasudnong buhatan sa ARTA, dako usab og tabang ang mga QR feedback mechanisms ug mga drop box nga gidumala sa Human Resources sa matag opisina aron daling makuha ug maaksyonan ang reaksyon sa mga lungsoranon.
Matod pa ni Sumalpong, medyo taas-taas ang proseso kon ang reklamo gikan sa ARTA tungod kay kinahanglan pa ang pagpataliwala o mediation sa komite tali sa nagreklamo ug sa opisina nga gireklamo aron makab-ot ang dinalian nga resolusyon.
Kon uyon ang nagreklamo sa gihatag nga dinalian nga solusyon, giisip na nga sulbad o “solved” ang maong kaso.
Apan kon dili magka-uyon, ang ARTA na mismo ang mosulod aron mo-imbestigar kon aduna bay probable cause nga mahimong basehan sa pagpasaka og pormal nga kaso batok sa maong opisina.
Sa pikas bahin, dako ang kalipay ni Sumalpong nga mibutyag nga wala pa silay nadawat nga bisan unsang pormal nga kaso batok sa lokal nga kagamhanan sa General Santos City ubos sa iyang paglingkod, hinungdan nga nagpabiling limpyo ang dungog sa dakbayan batok sa red tape.
