Niabot na sa kapin 100 ang patay ug kapin sa 390 ang gidudahang adunay kaso sa Ebola sa Democratic Republic of Congo (DRC) sigon sa Africa Centres for Disease Control and Prevention. Natala na sab ang virus sa Uganda kung diin adunay duha ka mga kunpirmadong kaso ug usa ang namatay.
Lakip sa mga kumpirmadong natakdan ang usa ka Amerikanong doktor sa DRC nga iagi sa Germany alang sa pagpatambal. Subay sab sa report nga pipila ka mga Amerikano ang posibleng naexpose sa virus nga kasamtangang gitabangan sa kagamhanan sa Estados Unidos.
Nauna na nga gideklara sa World Health Organization (WHO) ang outbreak isip public health emergency of international concern apan giklaro sab nga layo pa kini nga mahimong pandemic. Nipahimangno hinuon kini sa hugot nga pagsunod sa pamalaod labi na sa paglubong sa mga namatay tungod sa taas nga rate sa kadelikado sa nikatap nga virus.
Nipatuman sab og border screening ang mga silingan nga mga nasud sama sa Rwanda ug Nigeria isip lakang sa paglikay sa virus. Matod sa US Centers for Disease Control and Prevention (CDC) nga ubos ang kadelikado niini sa Amerika apan ilang namonitor ang mga biyahero gikan sa naapektuhan nga lugar nga niabot sa U.S.
Gawas niini, nipagawas sab ang Estados Unidos og Level 4 travel advisory, ang labing taas nga warning batok sa pagbisita sa DRC.
Sa kasamtangan, wala pay aprobado nga tambal o bakuna batok sa Bundibugyo strain sa Ebola hinungdan nga nanawagan ang Africa CDC ug WHO sa publiko nga sundon ang mga protocol ug palig-unon ang surveillance sa komunidad aron mapugngan ang pagkatap sa virus.
Photo courtesy:IBTimes UK
