Gibarogan ni Taiwanese President Lai Ching-te niadtong Dominggo nga dili niya ibaligya o ipagbaylo ang Taiwan, dungan sa pag-awhag sa Estados Unidos nga ipadayon ang pagbaligya og mga armas aron mapadayon ang kalinaw sa rehiyon.
Kini nga pamahayag gihimo human nagkanayon si US President Donald Trump nga mamahimong gamiton isip “bargaining chip” ang pagbaligya og armas sa Taiwan diha sa pakig-alayon sa China, nga naglantaw sa Taiwan isip kabahin sa ilang teritoryo.
Sa usa ka pamahayag sa Facebook, gipahayag ni Lai nga ang nagpadayong pagbaligya og armas sa US ngadto sa Taiwan ug ang pagpalawom sa security cooperation mahinungdanon kaayo sa pagmintinar sa regional peace ug stability.
Dugang pa niya, ang Taiwan anaa sa sentro sa kalibutanong interes tungod sa importante nga papel niini sa AI ug semiconductor industry, ug dili isakripisyo o ipagbaylo.
Nagpadayag og kabalaka ang Taipei human sa pamahayag ni Trump nga mamahimong gamiton ang arms sales isip negotiating tool ngadto sa China. Matod kaniya, usa kini ka “very good negotiating chip” para sa US.
Subay sa balaud sa US, obligado ang Amerika nga mohatag og armas sa Taiwan alang sa depensa niini, bisan pa man og nagpabiling dili klaro kon direktang motabang ba sa militar ang US kon ugaling sulongon ang isla.
Giingon usab ni US House Speaker Mike Johnson nga makatarunganon ang nahimong pamahayag ni Lai ug kinahanglan ipakita sa Taiwan ang iyang kusog.
Gihatagan usab og gibug-aton ni Lai nga ang China ang hihungdan sa regional instability apan iyang gipasabot nga dili usab magpadaog ang Taiwan sa pressure ug pabilin gihapon ang kasamtangang status quo.
Photo courtesy: Anadolu Ajansi
