Usa ka talagsaon nga klase sa keso sa Brazil karon ang nakapaingon sa mga netizens og “unsa man ni uy!” human gibutangan kini og toasted nga hulmigas isip espesyal nga sangkap.
Ang maong keso nga gitawag og Taiada Silvania gihimo ni Camila Almeida sa Sao Paulo diin iyang naisipan nga sagolan og leafcutter ants o hulmigas ang ilang keso aron mas daghang turista ang maengganyo sa ilang lugar.
Matod ni Almeida, dugay nang ginakaon sa ilang lugar ang maong klase sa hulmigas maong iyang gihuna-huna nga basin pwede usab kini isagol sa keso. Ug wa siya masayop kay bisan ang mga taga-Europe nakuratan apan ganahan sa lami niini.
Sa tinuod, nakadaog pa gani og bronze medal ang maong “ant cheese” sa usa ka international cheese competition sa France niadtong 2021.
Matod sa naghimo niini, adunay kunoy lasa nga murag almonds ug chestnuts ang keso apan adunay “crunch” tungod sa hulmigas.
Daghang netizens usab ang nagbinuang nga: “Abi nako black pepper ra, hulmigas man diay!”
Samtang ang uban miingon:“Pwede siguro ni ipares sa pan ug Baygon!”
Bisan pa man sa kataw-anan nga reaksyon sa uban, nahimo nang popular ang maong keso sa Brazil ug uban pang nasud sa South America.
Photo courtesy: Oddity Central
