Nahimong realidad ang lakang padulong sa mas konektado ug accessible sa komunidad human opisyal nga giinagurahan ang Box Culvert ug Road Concreting Projects sa Barangay Mantija, Dakbayan sa Danao.
Miduyog sa inagurasyon sila Danao City Mayor Nito Durano kauban ang mga konsehal nga sila Atty. Glee Delicano, Roland Perez, ug Jed Almendras, uban sa mga residente ug opisyal sa barangay nga nagpasalamat sa nahuman nga mga proyekto.
Sumala sa lokal nga kagamhanan, dako og ikatabang ang bag-ong dalan ug taytayon aron malig-on ang koneksyon ilabina sa mga kabukiran ug kasikbit nga barangay nga nanginahanglan og mas luwas, sayon, ug paspas nga agianan alang sa adlaw-adlaw nga panginabuhi, emergency response, transportasyon, ug pagdala sa mga produkto ug serbisyo.
Gihingusgan usab nga ang maong mga proyekto kabahin sa “Connectivity Agenda” ni Mayor Durano nga nagtumong sa pagpalig-on sa imprastraktura nga dili lamang magsumpay sa mga lugar kondili usab sa mga oportunidad ug sa nag-unang serbisyo alang sa matag Pamilyang Danawanon.
Dugang pa sa dakbayan nga padayon pa nilang paabuton ang mas daghang imprastraktura nga proyekto sa nagkadaiyang barangay sa Danao City sa umaabot nga mga bulan.
Photo courtesy: Danao-City Gov’t
