Giila nga record-holder si Li Fengqiang luyo sa usa ka makalilisang nga trahedya nga miresulta nga nawad-an kini og duha ka kamot, opisyal nga narekord sa Guinness World Records si Li human niya nahimo ang maong buluhaton sulod lamang sa 25.73 ka Segundo sa paghubo og pag suot sa medyas gamit lang ang wala nga tiil.
Nahimong inspirasyon si Li, kinsa nagtrabaho karon isip usa ka sports coach para sa mga kauban nga may kapansanan (PWDs). Sumala kaniya, gihimo niya kini aron pamatud-an nga dili babag ang pisikal nga kahimtang aron makab-ot ang mga pangandoy sa kinabuhi.
Nag-edad pa lang og otso anyos si Li sa dihang naaksidente kini ug nakasugat og high-voltage wire nga miresulta sa pagkaputol sa iyang duha ka bukton.
Giangkon ni Li nga dili sayon ang iyang giagian tungod kay kinahanglan niyang tun-an pag-usab ang tanang batakang buluhaton sama sa pagkaon, pagsulob og sinina, pagsulat, ug bisan ang pag-atiman sa kaugalingon sa kasilyas gamit ang iyang mga tiil. Matod niya, sagad kaniadto nga makasinati siya og nuka sa mga tudlo sa tiil, panuhot sa kaunoran (cramps), ug sige og kapandol. Apan imbes nga mosurender, gipili ni Li ang mosukol sa iyang kapalaran.
Bitbit ang iyang baruganan nga, “Kung unsa ang kaya nga buhaton sa mga tawo nga kompleto og lawas gamit ang kamot, kaya sab nako buhaton gamit ang akong mga tiil,” gipamatud-an ni Li nga dili kapansanan ang limitasyon sa abilidad sa usa ka tawo.
Giklaro ni Li nga ang iyang pagsalmot sa maong sock speed challenge dili lang kay aron sikaton, kundi aron hagiton ang iyang kaugalingon ug pamatud-an nga walay imposible.
Aron makuha ang maong world record, adlaw-adlaw nga nagpraktis si Li sa pagsuot ug paghukas sa iyang medyas matag higayon nga duna siyay bakante nga oras sa trabaho, hangtod nga nahimo na kini nga natural nga lihok sa iyang lawas.
Photo courtesy: Guinness World of Record
