Pito ka indibidwal ang namatay sa sunod-sunod nga airstrikes sa Lebanon nga gihimo sa Israel niadtong Domingo, lakip na ang usa ka commander sa Islamic Jihad, sumala sa Lebanese authorities ug state media.
Base sa report sa health ministry, tulo ang namatay sa lungsod sa Tayr Felsay, lakip ang usa ka bata, samtang duha usab ang namatay sa Tayr Debba. Dugang pa niini, usa ka missile strike duol sa siyudad sa Baalbek ang nakapatay kang Wael Abdel Halim, usa ka commander sa Islamic Jihad, ug iyang 17-anyos nga anak nga babaye.
Bisan pa sa naglungtad nga ceasefire, padayon gihapon ang airstrikes sa Israel sa southern Lebanon ug kanunay nga nagpagawas og evacuation warnings sa mga lungsod ug baryo nga duol sa border.
Sa laing bahin, gikondena sa Hezbollah ang US-brokered talks tali sa Lebanon ug Israel, ug gitawag kini nga “dead end.” Sumala kang Hezbollah lawmaker Hussein Hajj Hassan, wala’y maayong resulta ang direktang negosasyon ug mahimo lamang kini’g sunod-sunod nga konsesyon pabor sa Israel.
Samtang, giingon ni Israeli Prime Minister Benjamin Netanyahu nga padayon ang ilang operasyon aron protektahan ang ilang komunidad ug supakon ang hulga gikan sa Hezbollah, ilabi na ang paggamit sa FPV drones.
Sumala sa Lebanese authorities, kapin 2,900 na ka tawo ang namatay sa Lebanon sukad nagsugod ang gubat, lakip ang sobra 400 ka namatay bisan pa sa ceasefire nga nagsugod niadtong Abril 17.
Photo Courtesy: RTL Today
