Nagpasidaan ang Department of Agriculture sa mga rice retailer, trader, ug importer nga posibleng mag-atubang og dako nga multa ug pagkabilanggo kon molapas sa gipahamtang nga price cap sa imported rice.
Matod ni DA Secretary Francisco Tiu Laurel Jr., dili na lamang “suggested” ang presyo sa imported rice tungod kay adunay na’y legal nga silot alang sa mga dili motuman sa mando sa gobyerno.
Ubos sa Executive Order No. 118 nga gipirmahan ni Ferdinand Marcos Jr., gitakda ang maximum nga presyo sa imported rice sa P50 matag kilo sulod sa 30 ka adlaw aron mapugngan ang sobra ug dili makatarunganong pagsaka sa presyo sa bugas.
Sumala sa Price Act o Republic Act No. 7581, ang mapamatud-ang nakalapas sa price ceiling mahimong mapriso gikan usa hangtod 10 ka tuig ug mamultahan gikan P5,000 hangtod P1 milyon, o parehong silot.
Gawas niini, posible usab nga ipasira temporaryo o permanente ang establisyemento, kumpiskahon ang mga produkto, ug suspendihon o kanselahon ang permit ug lisensya sa negosyo.
Gipahibalo sa DA nga palig-onon nila ang inspeksyon ug monitoring sa mga merkado, supermarket, ug rice retail outlets sa tibuok nasud atol sa implementasyon sa rice price cap.
Matod pa sa ahensya, tumong sa temporaryong price ceiling nga mapanalipdan ang mga konsumidor batok sa pagpang-abuso sa presyo ug mapalig-on ang presyo sa bugas sa merkado.
Photo Courtesy: BusinessWorld
