Giaprobahan sa national government ang pag-abli og 32,916 ka bag-ong posisyon alang sa mga magtutudlo para sa School Year 2026–2027 aron maminusan ang kadaghan sa estudyante matag classroom ug mapagaan ang trabaho sa mga magtutudlo sa pampublikong eskwelahan.
Sumala sa Department of Budget and Management (DBM), giaprobahan nila ang hangyo sa Department of Education (DepEd) nga dugangan ang teaching workforce gikan Kindergarten hangtod Senior High School ug Alternative Learning System (ALS).
Matod ni Education Secretary Sonny Angara, ang dugang nga mga posisyon gitumong aron masulbad ang dugay nang kakulang sa mga magtutudlo ug mapaayo ang learner-to-teacher ratio sa pampublikong mga eskwelahan.
Sa kinatibuk-an, 32,047 niini mao ang Teacher I positions, samtang adunay 369 ka Teacher III posts alang sa Special Science Teachers ug 500 ka Teacher IV positions para sa Special Needs Education (SNED).
Ang Zamboanga Peninsula (Region IX) nakadawat sa pinakadaghan nga allocation nga 3,361 ka posisyon, diin 1,467 niini alang sa Schools Division sa Sulu tungod sa kakulang sa magtutudlo sa maong lugar.
Ang maong lakang kabahin usab sa pagpalambo sa career progression sa mga magtutudlo pinaagi sa Expanded Career Progression (ECP) system nga naghatag higayon sa mga magtutudlo nga mosaka ang ranggo ug sweldo bisan magpabilin sila sa classroom teaching.
Photo Courtesy: GMA News Online
