Gipaniguro sa National Grid Corporation of the Philippines o NGCP nga mapalig-on pa ang ilang serbisyo sa supply sa kuryente ngadto sa mga electric cooperative sa Region 9 pinaagi sa regular maintenance activity sa ilang transmission facilities.
Matod ni Teotimo Rommel Icao, Lead Specialist sa Government Relations and Regional Affairs sa NGCP Region 9, kabahin kini sa ilang preventive maintenance schedule aron masiguro ang lig-on ug padayon nga supply sa kuryente sa tibuok rehiyon.
Giingon usab sa opisyal nga importante ang maong kalihokan aron malikayan ang mas grabeng problema sa suplay sa kuryente ilabina sa panahon nga taas ang konsumo sa elektrisidad.
Apan iyang giingon, adunay pipila ka mga lugar nga posibleng makasinati og temporaryong pagkawala sa kuryente atol sa maintenance operation, apan kini planado na ug coordinated na sa mga electric cooperative sa matag probinsya.
Giawhag usab ni Icao ang publiko sa pagsabot ug pagpangandam atol sa iskedyul sa maintenance samtang gipasalig nilang padayon nilang palig-onon ang transmission system alang sa mas kasaligan nga serbisyo sa kuryente sa rehiyon 9.
