Giklaro sa City Election Officer sa Comelec Pagadian nga dili pa dayon opisyal nga rehistradong botante ang usa ka individual bisan human siya makapa-rehistro sa buhatan sa Comelec atol sa voter registration.
Sa interview sa Juander Radyo News Team kang Election Officer IV, Atty. Jed Labador, giklaro niya ang tanang aplikasyon sa voter registration moagi pa sa Election Registration Board o ERB hearing approval nga gikatakdang ipahigayon karong bulan sa Hunyo 2026.
Dugang pa ni Atty. Labador sa maong proseso, susihon ug beripikahon sa ERB ang tanang impormasyon ug dokumentong gisumite sa aplikante nga adunay mipetition aron maseguro nga kwalipikado silang maapil sa opisyal nga listahan sa mga botante.
Gipasabot sa maong election officer nga importante ang ERB hearing aron mapreserbar ang kalimpyo ug integridad sa voter registration process ug malikayan ang mga iregularidad sama sa doble nga rehistro ug sayop nga lugar asa gyud sila mobotar.
Gihangyo ni Atty. Labador ang publiko nga maghulat sa opisyal nga pag-apruba sa ilang aplikasyon human sa ERB hearing diha na matawag nga opisyal silang voter sa usa ka lugar.
