Nagpadayon karon ang pagpangandam sa Barangay Basak alang sa ilang umaabot nga selebrasyon sa “Araw ng Basak” karong Mayo 31, 2026.
Gipangunahan ni Kapitana Jocelyn B. Cuevaz ang sunod-sunod nga preparasyon uban sa mga opisyal sa barangay ug mga boluntaryo aron masiguro ang malinawon, organisado, ug malipayon nga kasaulogan alang sa tanang residente.
Sumala sa kapitana, naglakip sa mga kalihokan ang lain-laing aktibidad sama sa council of women day, mga dula sa komunidad, cultural presentations, health caravan, ug uban pang programa nga magpasiugda sa panaghiusa ug kultura sa barangay.
Gilauman usab nga mudagsa ang mga residente ug bisita nga moapil sa selebrasyon. Lakip sa mga pinasikad nga kalihokan ang kasalang barangay nga pangulohan ni Mayor Myrocel Clarin Balili, nga maghatag og dugang kalipay ug kahulugan sa maong okasyon.
Ang “Araw ng Basak” nagpabiling usa ka mahinungdanong higayon alang sa komunidad aron sa pagsaulog sa ilang kalambuan, pagpalig-on sa panaghiusa, ug padayon nga pag-uswag isip usa ka lig-on ug nagkahiusang barangay.
