Giklaro sa Armed Forces of the Philippines (AFP) nga ang pag-deploy sa mga Marines sa Senado kabahin lamang sa ilang standard security operations ug walay kalabutan sa bisan unsang bag-ong insidente sa politika.
Sumala ni AFP spokesperson Col. Francel Margareth Padilla, ang maong mga tropa regular nga gina-assign aron maghatag og perimeter security sa nagkadaiyang institusyon sa gobyerno base sa mga dugay na nga protocol.
Gipasabot ni Padilla nga gawas sa Senado, duna usab silay mga sakop nga naka assign sa Malacañang Palace ug bisan sa Rizal Monument isip kabahin sa ilang naandan nga buluhaton alang sa seguridad.
Kini nga katin-awan giluwatan sa AFP taliwala sa mga hungihong nga ang deployment adunay kalabutan sa posibleng pag-aresto kang Senador Ronald “Bato” dela Rosa may kalabutan sa iyang kaso sa International Criminal Court (ICC).
Gipasiugdahan usab sa AFP nga ang papel sa mga Marines limitado lamang sa perimeter security, hinungdan nga wala sila nagasulod sa sulod sa building sa Senado o sa Palasyo.
Hinuon, ang ilang deployment mahimo pa nga mausab depende sa sitwasyon kon ugaling mangayo og dugang nga tabang ang maong mga institusyon.
Photo Courtesy: twitter
