Mikabat na sa halos $29 bilyon ang gasto sa gubat sa Estados Unidos batok sa Iran, sumala sa Pentagon, samtang nagkadako ang pangutana sa mga mambabalaod bahin sa epekto niini sa military readiness sa Amerika.
Atol sa budget hearing sa Capitol Hill, giingon ni Defense Secretary Pete Hegseth nga nisaka ug mga $4 bilyon ang gasto kumpara sa ilang miaging banabana duha ka semana ang milabay.
Matod ni Pentagon finance chief Jules Hurst III, nisaka ang gasto tungod sa repair ug replacement sa military equipment ug uban pang operational expenses.
Samtang, nagpadayon gihapon ang tensyon tali sa United States ug Iran bisan pa sa ceasefire, diin giingon ni Presidente Donald Trump nga “life support” na lamang ang kasabutan human niya gisalikway ang latest peace proposal sa Tehran.
Gikuwestiyon usab sa mga Democrat lawmakers ang kakulang sa transparency sa administrasyon ug ang padayon nga pagtaas sa gasto sa gubat.
Nagpahayag usab si Senador Mark Kelly og kabalaka nga posibleng nahutdan na ug daghang advanced weapons systems ang Amerika tungod sa taas nga operasyon sa Middle East, nga mahimong makaapekto sa ilang kahandam sa umaabot nga tensyon batok sa China.
Bisan pa niini, giinsistir ni Hegseth nga igo pa gihapon ang armas ug missile reserves sa Amerika ug giingong “gi-exaggerate” lamang ang mga kabalaka bahin niini.
Photo Courtesy: Fortune
