Nanawagan ang nagkadaiyang stakeholders sa energy sector nga paspason sa Pilipinas ang pagpangita ug kaugalingong tinubdan sa oil ug gas tungod sa nagpadayon nga tensyon sa Middle East nga nakaapekto sa suplay sa enerhiya.
Sa 2026 Energy Summit nga gi-organisa sa Philippine Chamber of Commerce and Industry, giingon ni PCCI President Perry Ferrer nga sobra kaayo ang pagsalig sa nasud sa imported fossil fuel ug kinahanglan kini mausab.
Matod ni Philippine Petroleum Association President Edgar Cutiongco, nagkakunhod na ang produksyon sa Malampaya Gas Field ug sa Galoc oil field sa Palawan, busa importante nga mapadali ang oil exploration projects.
Gipasabot usab niya nga napag-iyaan ang Pilipinas kumpara sa ubang ASEAN countries tungod sa dugay nga permitting process, geopolitical tensions, ug isyu sa West Philippine Sea, ilabina sa Recto o Reed Bank nga adunay dakong potensyal nga gas reserves apan lisod ma-explore sa karon.
Samtang, giingon ni Ferrer nga kinahanglan usab motabang ang gobyerno sa pagpundo ug pagpangita sa mga investor alang sa dagkong energy projects.
Matod ni Finance Undersecretary Miko Alejandro, nagpadayon ang gobyerno sa pagpalambo sa ease of doing business aron mas daghang investors ang mosulod sa energy sector. Iyang gibutyag nga hapit ₱1 trilyon nga energy investments ang naaprubahan sa 2025, lakip na ang solar, wind ug hydropower projects nga adunay kapin 10,000 MW nga kapasidad.
Photo Courtesy: BusinessWorld
