Gipahimangnoan sa Malaybalay City Fire Station ang publiko kabahin sa mga lugar sa syudad nga giila nga fire-prone, lakip na ang Mercado, Natid-asan, ug Barangay 4. Matod pa, taas ang risgo sa sunog sa maong mga lugar tungod sa kadaghan sa kabalayan ug sa ka-piot sa mga dalan, nga mahimong babag sa paspas nga fire response operations.
Sa eksklusibong pakighinabi sa Juander Radyo Malaybalay, gipadayag ni Fire Officer 3 Brent Clyde Suico, Media Relations Officer sa Bureau of Fire Protection (BFP) Malaybalay, nga adunay gitawag nga “red zone” sa pipila ka bahin sa Barangay 4 diin mas dako ang posibilidad sa sunog.
Aron malikayan ang paglangan sa responde sa mga emerhensiya, nagpatuman usab ang syudad og mga no-parking zones, ilabina sa mga dalan padulong sa Natid-asan sa masiguro ang hapsay nga pag-agi sa dagkong fire trucks sa panahon sa sunog.
Gipadayag usab sa BFP nga naggamit sila og strategic mapping system, diin gimarkahan og pula ang mga high-risk areas aron mas mapadali ang pre-planning sa deployment sa mga fire trucks ug ang pag-identify sa labing epektibong ruta panahon sa sunog. Padayon sab ang implementasyon sa Oplan Ligtas Pamayanan (OLP), diin ang mga fire inspectors motuyok sa nagkadaiyang barangay aron magpatuman og safety inspections ug fire awareness campaigns.
Nagpasalamat usab ang Malaybalay City Fire Station sa kooperasyon sa mga barangay officials, fire brigades, ug Barangay Public Order and Safety Officers (BPSO), nga aktibong nagtabang sa pagpakaylap sa impormasyon kabahin sa fire safety sa matag purok
Photo Courtesy: Malaybalay City Fire Station
