Gibalhin sa usa ka ospital sa Tehran ang napriso nga Iranian Nobel Peace Prize winner nga si Narges Mohammadi human kini giatake sa kasingkasing duha ka semana na ang milabay. Sumala sa foundation nga gidumala sa iyang pamilya, temporaryong gisuspenso ang iyang sentensiya isip baylo sa dakong piyansa aron matambalan siya og husto.
Si Mohammadi, 54-anyos, nakadawat sa Nobel Peace Prize niadtong 2023 samtang napriso tungod sa iyang kampanya alang sa katungod sa kababayen-an ug pagsupak sa death penalty sa Iran.
Gikan sa prisohan sa Zanjan, gidala siya sa Tehran Pars Hospital diin siya tambalan sa iyang kaugalingong medical team.
Niadtong Pebrero, gisilotan pag-usab si Mohammadi og dugang pito ka tuig nga pagkabilanggo. Nadakpan usab siya niadtong Disyembre human niyang kondinahon ang pagkamatay sa abogado nga si Khosrow Alikordi.
Bisan pa man nga temporaryo siyang nakagawas sa prisohan, giingon sa iyang foundation nga dili igo ang suspension sa iyang sentensiya ug kinahanglan siyang hingpit nga buhian tungod kay nagkinahanglan siya og padayon nga pagtambal.
Samtang niini, padayon usab nga gibantayan sa international rights groups ang sitwasyon sa Iran tungod sa mga report sa crackdown, internet restrictions, ug giingong padayon nga pagbitay sa mga nalambigit sa mga protesta sa nasud.
Photo courtesy: Britannica
