Gikumpirma sa European Commission nga nag-andam kini og pag-imbitar sa mga opisyal sa Taliban ngadto sa Brussels aron hisgutan ang pagpauli sa mga Afghan migrants gikan sa Europe. Ang sulat gilauman nga ipadala “sa dili madugay” aron ma-iskedyul ang miting sa Belgian capital, uban sa koordinasyon sa Sweden.
Kabahin kini sa padayon nga technical discussions human sa miaging pagbisita sa EU officials sa Afghanistan. Wala pa’y klarong petsa sa miting, apan nagtinabangay na ang EU ug Sweden aron ipadayon ang mga pakigpulong uban sa de-facto nga awtoridad sa Afghanistan.
Sa mas lapad nga polisiya sa imigrasyon, mga 20 ka EU countries nagtan-aw og paagi sa pagpauli sa mga Afghan migrants, ilabi na kadtong adunay criminal records. Apan nagpabilin kining komplikado kay ang Taliban wala pormal nga giila sa European Union sukad niadtong nibalik sila sa gahum niadtong 2021.
Samtang, nagpadayon ang dakong humanitarian crisis sa Afghanistan, diin milyon-milyon na ka Afghan ang nibalik gikan sa Iran ug Pakistan ug naglisod gihapon sa pinuy-anan ug panginabuhian.
Photo Courtesy: Rapid Asia
