Gipirmahan sa Pilipinas ug Paraguay ang usa ka kasabutan nga nagwagtang sa visa requirements para sa ordinary passport holders, nga tumong nga mapalambo ang trade, tourism, ug people-to-people exchanges tali sa duha ka nasud.
Gisaksihan ni President Ferdinand Marcos Jr. ug Paraguayan President Santiago Peña Palacios ang pagpirma sa Visa Waiver Agreement sa Malacañang, kauban ang ilang mga foreign affairs officials. Apil usab sa gipirmahan ang usa ka Memorandum of Understanding sa diplomatic training tali sa duha ka foreign ministries.
Gawas niini, nagkasabot usab ang duha ka lider nga palig-onon ang kooperasyon sa agrikultura, trade, ug renewable energy.
Gi-highlight ni Marcos ang posibleng pag-export sa Pilipinas og tuna, sardinas, ug bangus ngadto sa Paraguay, samtang giablihan na usab ang merkado sa Pilipinas para sa beef, pork, ug poultry gikan sa Paraguay.
Gipasiugda ni Peña nga dako ang potensyal sa pagpalapad sa trade, ilabi na sa agricultural products ug food security needs sa Pilipinas, nga adunay kapin 100 milyones ka konsyumer.
Giingon usab niya nga ang Paraguay nag-offer og competitive investment environment ug logistics opportunities pinaagi sa Bioceanic Corridor, nga makapahimo niini nga trade bridge tali sa Atlantic ug Pacific.
Ang duha ka nasud nagtan-aw usab sa mas lapad nga regional cooperation pinaagi sa ASEAN chairmanship sa Pilipinas ug Mercosur presidency sa Paraguay karong tuig.
Photo Courtesy: GMA news
