Gipadangat ni Konsehal Eric Salcedo, kinsa chairman sab sa Committee on Public Utilities ang kadismaya sa mga konsumante sa pagsaka sa binulan nga singil sa kuryente sa CEPALCO.
Atol sa regular nga sesyon kagahapong adlawa, gipresentar ni Salcedo ang billing sa pipila ka mga konsumante gikan bulan sa Marso hangtud Abril aron nga makompara ang taas nga pagsaka sa singil sa kuryente taliwala sa gamay nga paglihok sa ilang konsumo.
Tungod wala nag-abiso ang CEPALCO, giduso ni Konsehal Salcedo ang usa ka resolusyon nga mag-imbita sa CEPALCO aron nga mapasabot ug mapaklaro sa mga konsumante ang kasamtangan nilang electric rates ug kung asa gikan ang pagsaka sa singil.
Gipunting sab sa Konsehal nga ayha magpatuman og taas singil, adunay ginapangayo nga requirements ang Energy Regulatory Commission lakip na notice sa mga apektadong konsumante ug pagpahigayog og public hearing.
Gawas pa niini ang paghangyo sa buhatan sa Mayor nga makamugna og Local Energy Board aron nga maprotektahan ang katungod sa mga konsumante.
Photo courtesy: Cagayan de Oro City Council
