Nagpahayag ang Department of Social Welfare and Development (DSWD) nga kapin sa 1.6 milyon ka pamilyang Pilipino na ang nakalingkawas sa kapobrehon pinaagi sa Pantawid Pamilyang Pilipino Program o 4Ps.
Sumala kang DSWD spokesperson Assistant Secretary Irene Dumlao, ang maong kalampusan nagpakita sa padayon nga paningkamot sa gobyerno aron matabangan ang mga kabus nga pamilya nga mahimong self-sufficient ug makagawas sa siklo sa kapobrehon.
Kadaghanan sa mga pamilyang naka-graduate sa programa gikan sa Cordillera Administrative Region, gisundan sa National Capital Region, Ilocos Region, Calabarzon, ug Central Luzon.
Gisusi sa 4Ps National Program Management Office ang mga benepisyaryo pinaagi sa Social Welfare and Development Indicator o SWDI aron matino kung nakaabot na sila sa lebel sa pagka-self-sufficient.
Matud pa sa DSWD, ang 4Ps dili lang temporaryong ayuda kundili usa ka investment alang sa kaugmaon sa mga pamilyang Pilipino, ilabina sa panglawas ug edukasyon sa mga kabataan.
Isip pag-ila sa ilang kalampusan, gipahigayon usab ang “Pugay Tagumpay” graduation ceremonies diin gihatagan og sertipiko ang mga pamilyang naka-graduate sa programa.
Photo Courtesy: PNA
