Gipahimangnoan ni Senador Erwin Tulfo ang Department of Foreign Affairs (DFA) nga siguruhon ang kaluwasan sa mga Pilipinong seafarers nga moagi sa Strait of Hormuz human sa insidente sa pag-atake sa usa ka barko nga adunay 24 ka Pinoy crew.
Sumala sa report, pito ka seafarers ang nasamdan samtang tulo ang grabe ang kahimtang human maigo ang Maltese-flagged container ship sa giingong pag-atake nga may kalabotan sa Iran niadtong Mayo 5.
Giingon ni Tulfo nga kinahanglan klaro kung luwas pa ba ang pag-agi sa mga Pinoy seafarers sa maong ruta ug kung tinuod pa ba ang kasabotan sa “safe passage” alang kanila.
Nangandam usab ang DFA nga makigpulong sa Iranian Ambassador karong semanaha aron klarohon kung padayon pa ba ang garantiya sa kaluwasan sa mga Pilipinong tripulante.
Sa karon, nanawagan ang gobyerno sa hapsay nga komunikasyon ug koordinasyon aron malikayan ang dugang nga peligro sa mga seafarers sa maong kritikal nga ruta.
Photo Courtesy: wikipedia
