Nasikop sa gilusad nga joint buy-bust operation sa mga operatiba, sa Philippine Drug Enforcement Agency Regional Office 13, ang usa ka priority drug personality sa Purok 4, Barangay Obrero, Butuan City, alas 6:36 sa gabii.
Giila ang nadakpan nga si alyas “Popoy,” 47 anyos, residente sa Purok 5, Upper Doongan, Butuan City, nga nalista isip priority drug personality sa rehiyon.
Ang operasyon gikasa sa hiniusang pwersa sa PDEA RO 13, Regional Special Enforcement Team, Agusan del Norte Provincial Office, Legal and Prosecution Unit, Seaport Interdiction Unit-Nasipit, Plans and Operations Division, Regional Barangay Drug Clearing Program Team ug mga personahe sa Butuan City Police Office pinaagi sa Butuan City Police Station 3.
Nakumpiska gikan sa suspek ang gibanabana nga P40,800 kantidad sa ginadudahang shabu nga gisulod sa tulo ka heat-sealed transparent plastic sachets. Narekober usab ang buy-bust money ug cellphone nga gigamit sa suspek sa ilegal nga transaksyon sa droga.
Base sa imbestigasyon, positibo usab sa paggamit og ilegal nga droga ang suspek ug karon anaa sa kustodiya sa PDEA RO 13, samtang giandam ang kasong paglapas sa Section 5 o pagbaligya sa ilegal nga droga ug Section 11 o possession of dangerous drugs ubos sa Republic Act 9165 o Comprehensive Dangerous Drugs Act of 2002.
Gidasig usab sa PDEA RO 13 ang publiko nga magpadayon sa pagreport sa mga kahina-hinalang kalihokan nga may kalabotan sa ilegal nga droga aron mapalig-on pa ang kampanya alang sa luwas ug drug-free nga mga komunidad sa Caraga Region.
Photo Courtesy:PDEA 13
