Nagpabiling dakong garbo sa Syudad sa Tagum ang impresibong performance sa mga atletang Tagumenyo nga mipartisipar sa Iligan City Karate Showdown 2026 nga gipahigayon sa Iligan City.
Gikan sa AUK Team Tagum ang mga atleta nga nakapakita og talagsaong kahanas, disiplina, ug determinasyon sa natad sa karate, diin nakadaog sila og nagkalain-laing medalya sa Kata ug Kumite categories.
Nanguna sa mga mananaog si Xea Molijon, nga nakasungkit sa gold medal sa Kata category ug bronze medal sa Kumite category. Nakadugang usab sa kadaugan si Deniese Dalisay, nga midaog og gold medal sa Kata category. Samtang, si Sam Gementiza ug si Dean Cantoy matag usa nakabaton og bronze medal sa Kata category, ug si Brianna Amarado nakakuha og silver medal sa Kumite category.
Sumala sa mga coaches ug supporters sa team, ang kalampusan sa mga atleta bunga sa ilang padayon nga ensayo, dedikasyon, ug paningkamot aron mapalambo ang ilang talento sa karate. Ang ilang kadaugan wala lamang nagdala og dungog sa ilang tagsa-tagsa ka pamilya ug eskwelahan, kondili usab sa tibuok dakbayan sa Tagum.
Nagpamatuod kini nga ang mga Tagumenyo adunay igong talento ug abilidad aron makiglumba ug molampos sa dagkong kompetisyon sa nasud. Padayon nga gipahalipayan ug gipasidunggan sa komunidad ang mga atleta alang sa ilang mahinungdanong nahimo ug inspirasyon nga ilang gihatag sa kabatan-onan.
Photo Courtesy : City Government of Tagum
