Patay ang usa ka kumander sa Communist Terrorist Group (CTG) ubos sa North Eastern Mindanao Regional Committee (NEMRC), samtang usa usab ka miyembro niini ang nadakpan human sa armadong engkwentro tali sa tropa sa kasundalohan ug mga rebelde sa Sitio Casting, Barangay Bayan, lungsod sa Marihatag, Surigao del Sur sayong buntag karong adlawa, Mayo 11, 2026.
Ang operasyon gihimo sa tropa sa 75th Infantry “Marauder” Battalion ubos sa pagpanguna ni LTC Earl C. Pardillo ug sa 3rd Special Forces “Arrowhead” Battalion ubos ni LTC Jayson F. Pangandoyon, nga parehong naa sa operational control sa 401st Infantry Brigade.
Sa exclusive interview sa Juander Radyo Tandag kang 401st Acting Brigade Commander Colonel Glenn Joy Aynera, iyang gikumpirma nga atol sa ilang pagpatrolya sa maong lugar, ilang nasugatan ang maong grupo.
Matod pa ni Col. Aynera, nakig-engkwentro ang tropa sa militar sa mga miyembro sa NPA, nga miresulta sa pagkamatay ni Edilberto Daval alyas “Bong/Waco/Bill,” nga giila isip 2nd Deputy Secretary sa Executive Committee sa NEMRC ug Commanding Officer sa Regional Operations Command (ROC) sa NEMRC.
Nadakpan usab sa militar si Jaymark Bada Lamela alyas “Miggy/Migz,” nga giila nga security member sa ROC-NEMRC. Narekober usab sa lugar sa engkwentro ang usa ka Tavor TAR-21 assault rifle ug usa ka R4 rifle.
Kahinumdoman nga kaniadto lamang Abril 17, 2026, sunod-sunod usab nga mga engkwentro nga nahitabo diin napukan ang ubang miyembro sa CTG, lakip na si Lucena Canda alyas “Louise/Madi,” nga asawa ni Daval.
Dugang pa sa opisyal, dakong lakang kini sa kampanya sa gobyerno batok sa insurhensya sa lalawigan sa Surigao del Sur.
Sa karon, nagpadayon pa ang clearing operations sa kasundalohan sa lugar aron masiguro nga wala nay laing rebelde nga nagpabilin sa maong komunidad. Gikustodiya usab sa militar ang nadakpang miyembro sa NPA alang sa hustong imbestigasyon ug legal nga proseso.
Photo Courtesy: 401st Infantry Brigade
