Nagpadayon ang imbestigasyon sa Labangan Municipal Police Station human mireklamo ang usa ka 38-anyos nga bao-bao driver kalabot sa carnapping sa iyang tri-wheeler bao-bao sa may Purok Bougainvillea, Barangay Upper Pulacan, Labangan, Zamboanga del Sur, kagahapon, Mayo 10, 2026.
Subay sa imbestigasyon sa kapulisan, namatikdan matod pa sa biktima alas 5:00 sa buntag nga nawala na ang iyang bao-bao nga giparking gawas sa ilang panimalay daplin sa highway.
Sa pagsusi sa CCTV footage, nakita matod pa ang duha ka wala mailhing tawo nga miduol ug mikuha sa sakyanan alas 12:36 sa kaadlawon sa maong adlaw ug apil nga gikuha ang motorcycle franchise nga gibutang ilawom sa lingkoranan sa driver.
Nasayran usab sa kapulisan nga wala ma-lock ug wala mabantayi ang tri-wheeler bao-bao sa dihang nahitabo ang insidente.
Padayon pa karon ang follow-up operation ug imbestigasyon sa Labangan Municipal Police Station aron mailhan ug madakpan ang mga suspetsado.
