Safety First, kini ang pahimangno sa kapulisan sa Initao, Misamis Oriental sa publiko nga unahon ang kaluwasan atol sa paglulinghayaw sa mga baybayon karong panahon sa tag-init.
Matud ni Police Corporal Rickey Alagon Jr., investigator sa Initao Municipal Police Station, likayan ang paglangoy o pagkaligo sa lawom nga bahin sa dagat ilabina kon dili hanas mosalom.
Ang pahimangno nisunod human sa trahedya sa Barangay San Pedro diin nalumos ug namatay ang usa ka 13-anyos nga batang babaye ug usa ka 44-anyos nga lalaki atol sa picnic uban sa ilang mga silingan.
Sumala sa imbestigasyon, kalit nga mikusog ang hampak sa balod ug gidala sa solog ang mga biktima ngadto sa lawom nga bahin sa dagat.
Giawhag usab sa kapulisan ang publiko nga magmatngon ug sundon ang safety measures aron malikayan ang susamang insidente panahon sa summer outings.
Photo courtesy: Initao MPS
