Gipangandaman sa Department of Education (DepEd) ug ang Kagamhanang Panlalawigan sa Agusan del Sur ang 2026 Palarong Pambansa, dungan sa pagpatuman sa mas estriktong safety ug health protocols sa dili pa ang pag-abli niini karong Mayo 24.
Sumala sa mga organizer, ibalhin sa ulahing bahin sa hapon ug sa gabii ang mga dula aron malikayan ang mga risgo nga may kalabutan sa grabeng kainit (heat-related risks) alang sa mga student-athlete.
Gihatagan og gibug-aton ni DepEd Secretary Sonny Angara nga nagpabiling prayoridad ang kaayohan sa mga atleta.
Magpatuman usab og mas estriktong hydration measures ug sigurohon ang walay hunong nga suplay sa tubig sa tanang mga venue.
Una nang gibutyag ni Agusan del Sur Governor Santiago Cane Jr., kapin sa 97 porsyento na nga kompleto ang mga pagpangandam sa imprastraktura human ang duha ka tuig nga preparasyon. Dugang pa niya, adlaw-adlaw ang pag-abot sa mga kagamitan alang sa mga dula ug ipailalom kini sa dry run sa dili pa ang aktwal nga kompetisyon.
Gi-activate na usab ang mga komprehensibong safety measures lakip na ang:
- 24/7 police visibility
- Emergency medical teams ug mga ambulansya
- Operational emergency operations center
- Disaster preparedness simulations (sama sa fire ug earthquake drills)
Matod ni DepEd Caraga Regional Director Maria Ines Asuncion, ang pagpangandam sa lalawigan naghatag og taas nga sumbanan alang sa mga mosunod pang national sporting events.
Gilauman nga dagsaon ang 2026 Palarong Pambansa sa kapin 20,000 ka mga atleta, coaches, ug opisyal gikan sa 18 ka rehiyon sa tibuok nasod.
Photo courtesy: DEPED
