Gipahibalo ni Anais Legand, usa ka eksperto sa teknikal sa viral hemorrhagic fevers sa World Health Organization (WHO) nga posibleng dili sa cruise ship nga MV Hondius, nagsugod ang unang kaso sa hantavirus.
Matod pa niya nga ang oras tali sa impeksyon ug pagsugod sa mga sintomas sa maong sakit, modagan pa ngadto sa usa ug unom ka semana.
Iyang giklaro nga ang kaso sa usa ka Dutch national nga pasahero, kinsa usa sa walo nga nakumpirma nga natakdan sa virus, unang nagpakita sa sintomas sama sa hilanat, sakit sa ulo ug diarrhea niadtong Abril 6, samtang nakasinati siya og respiratory distress niadtong Abril 11 ug namatay ra usab sa susamang adlaw. Sa maong dagan, posible nga ang una nga kaso wala nagsugod sa barko.
Kahibaloan nga ang Hantavirus kasagarang mapasa gikan sa mga ihi, hugaw o laway sa ilaga ug ang usa ka pamaagi niini sa pagtakod mao ang ginatawag nga Andes virus. Base sa inisyal nga ebidensiya sa WHO, nga ang Andes virus mahimong mapasa gikan sa usa ka tawo ngadto sa lain pinaagi na sa pagbayloay ug laway o paghalok sa magtiayon.
Photo Courtesy: WHO
