Nakahimo og kasaysayan si Professor Mashudu Tshifularo, usa ka ENT specialist sa University of Pretoria, human niyang pangunahan ang unang operasyon sa kalibutan nga nakapabalik sa pandungog gamit ang 3D-printed nga middle-ear bones. Gihimo ang maong operasyon niadtong Marso 2019 sa Steve Biko Academic Hospital sa Pretoria.
Sumala pa, ang tunga nga bahin sa dalunggan adunay tulo ka gagmay’ng bukog nga gitawag og hammer, anvil, ug stirrup. Mao kini ang responsable sa pagdala sa sound vibrations padulong sa sulod sa dalunggan, aron makadungog ang usa ka tawo. Apan, kung madaot o dili normal ang porma niini, mahimong maputol ang pagbalhin sa tingog ug mosangpot sa pagkawala sa pandungog. Aron masulbad kini, gipulihan sa grupo ni Tshifularo ang nadaot nga mga bukog pinaagi sa custom-made nga 3D-printed titanium implants nga compatible sa lawas sa tawo.
Ang unang pasyente usa ka 40-anyos nga lalaki nga nawad-an og pandungog tungod sa trauma. Human sa operasyon ug pagtangtang sa benda, nakita dayon ang dakong pag-improve sa iyang abilidad sa pagpaminaw.
Sunod usab nga gipahigayon ang parehas nga operasyon sa usa ka pasyente nga natawo nga kulang og development ang middle ear. Pinaagi sa samang teknolohiya, murag gitukod pag-usab ang agianan sa tingog sulod sa iyang dalunggan.
Matod pa sa mga eksperto, dili niini matambalan ang tanang matang sa pagkabungol. Kini espesipikong gitumong alang sa conductive hearing loss, usa ka kondisyon diin mekanikal ang problema ug dili ang nerves sa pandungog.
Bisan pa man, alang sa mga pasyenteng adunay maong kondisyon, dako kining paglaom tungod kay nagtanyag kini og permanente ug eksaktong solusyon nga gihimo base sa ilang panginahanglan.
Ang maong kalampusan giila isip dakong lakang sa medical innovation sa Africa ug usa ka ehemplo sa paggamit sa teknolohiya, aron mausab ang kinabuhi sa mga tawo nga adunay hearing loss.
Photo Courtesy : Electric Sparks
