Gi-endorso na sa Senate Committee on Justice and Human Rights ngadto sa plenaryo ang mga balaodnon nga maghatag og Philippine citizenship nilang Bennie Boatwright ug Matthew Ramos.
Gihisgotan sa komite ang mga sugyot gikan sa Kamara ug Senado nga nagtumong sa pag-ila sa kontribusyon ni Boatwright sa basketball ug ni Ramos sa wrestling, ilabi na sa ilang tinguha nga morepresentar sa Pilipinas sa mga international competition.
Sumala sa mga magbabalaod, makatabang ang duha sa pagpalig-on sa mga national team ug magsilbing inspirasyon sa mga kabataang atletang Pilipino.
Si Boatwright, 6-foot-10 forward gikan sa Los Angeles, nakaduwa na sa nagkadaiyang international leagues ug sa Philippine Basketball Association (PBA), diin nitabang siya sa San Miguel Beermen nga makakuha og kampeonato.
Samtang, si Ramos, nga adunay dugong Pilipino gikan sa iyang amahan, usa ka accomplished wrestler nga nahimong world champion sa cadet level ug nailhan isip NCAA All-American samtang nagduwa sa Purdue University.
Ang duha parehong nagpadayag sa ilang tinguha nga mahimong Pilipino ug morepresentar sa nasod sa mga pang-kalibutang kompetisyon.
Kon maaprubahan sa Senado ug mahimong balaod, hingpit nang mahimong lungsoranong Pilipino silang Boatwright ug Ramos, nga maghatag og dalan aron makaduwa sila alang sa Pilipinas sa international stage.
Photo courtesy: Senate of the Philippines
