Mikunhod og kapin sa ₱1 bilyon ang bili sa produksyon sa agrikultura ug pangisda sa nasod sa unang tulo ka bulan sa 2026 tungod sa 0.3 porsyento nga pagkunhod niini. Sumala sa Philippine Statistics Authority (PSA), ang kinatibuk-ang bili niabot lang sa ₱437.52 bilyon itandi sa ₱438.65 bilyon sa miaging tuig. Ang pag-ubos giduso sa crops subsector, nga naglangkob sa 55 porsyento sa kinatibuk-ang output, human kini niusos og 2.4 porsyento tungod sa epekto sa mga sunod-sunod nga bagyo niadtong 2025 ug ang pagkunhod sa produksyon sa palay.
Bisan pa sa kalisod sa mga pananom ug pangisda—nga nitala og kapin sa unom ka porsyento nga pag-usos tungod sa mga hagit sa palibot—nagpabiling lig-on ang sektor sa manokan (poultry) ug kahayopan (livestock).
Ang produksyon sa poultry nisaka og 7.1 porsyento ngadto sa ₱80.83 bilyon, samtang ang livestock niasenso og 5.1 porsyento ngadto sa ₱60.74 bilyon tungod sa padayon nga pagrekober sa produksyon sa baboy sa nasod. Kining mga sektor ang nagsilbing alalay aron dili hingpit nga mahugno ang suplay sa pagkaon taliwala sa pagsaka sa presyo sa lana ug abono tungod sa gubat sa Middle East.
Nagpabiling malaumon si Agriculture Secretary Francisco Tiu Laurel nga mobawi ang agrikultura sa ikaduhang quarter, apan nagpahimangno ang mga eksperto sama ni Danilo Fausto sa PCAFI bahin sa mas dakong hulga.
Gipaabot nga mas bation ang epekto sa taas nga gasto sa produksyon sa ikatulong quarter, dungan sa hulga sa usa ka “super” El Niño nga mahimong mopauga sa mga tinubdan sa tubig. Tungod niini, nangandam karon ang gobyerno sa paghatag og dinalian nga tabang ug interbensyon aron madumala ang mga hagit nga giatubang sa mga mag-uuma ug mangingisda karong tuiga.
Photo courtesy: Slideshare
