Mawagtang na ang fixed kon untop nga usa ka libo nga bayrunon sa tanang patigayon nga buot mukuha og Barangay Clearance human nga gipalabang sa konseho ang ordinansa nga mag-amyenda sa Ease of Doing Business Ordinance dinhi sa Cagayan de Oro.
Saysay pa ni Konsehal Jonjon Rodriguez, nangamahan sa ordinansa nga tungod sa fixed Barangay Clearance fee, nahuyang kon nawad-an og gahum ang mga Barangay sa pagdumala sa ilahang hurisdiksyon partikular na diha sa pagpaningil og bayrunon nga haom sab sa ilahang panginahanglan.
Pagpasabot sa Konsehal nga sa reyalidad, managlahi man ang kapasidad ug panginahanglan sa matag Barangay labi na kung sila nahimutang sa sentrong bahin o sa hilit nga dapit sa syudad.
Tungod giaprubahan sa konseho ang mga kausaban, ang Barangay na ang mutakda sa ilahang barangay clearance fee, depende sa lokasyon ug kadako sa negosyo subay sa ilahang lokal nga ordinsa nga muagi sab sa pagrepaso sa lokal nga panggamhanan sa syudad.
