Gisugdan na pag-usab ang konstruksyon sa reservoir nga dugay nang wala mahuman sa Prime Water sa Landing Area, barangay Casisang dakbayan sa Malaybalay
Sumala ni Mayor Jay Warren R. Pabillaran nga miabot na niadtong miaging adlaw ang mga construction workers ug mga materyales sama sa steel plates ug drum sa krudo alang sa pagpadayon sa proyekto. Ang reservoir adunay kapasidad nga 1,000 cubic meters ug gilauman nga makatabang sa suplay sa tubig sa Landing Area sa maong barangay
Matod pa, ang pagbalik sa proyekto nahitabo human makumpirma nga naaprubahan na sa Philippine Competition Commission ang pagpalit sa Prime Water ni negosyante Lucio Co, nga maoy bag-ong tag-iya sa kompanya.
Giingon usab ni Pabillaran nga giinform siya sa bag-ong management mahitungod sa ilang plano alang sa water system sa siyudad ug gilauman nga adunay kausaban sa serbisyo sa tubig sa Malaybalay.
Bisan pa niini, mihangyo ang mayor sa pasensya gikan sa mga residente samtang hinay-hinay nga ginatrabaho ang mga proyekto sa tubig. Matod niya, dili dali ang pagpatuman sa maong mga kalamboan tungod kay nagkinahanglan kini og dako nga pondo ug dugang nga trabaho.
Dugang pa sa Mayor, gilauman usab nga moanhi sa Malaybalay ning bulan sa Mayo ang bag-ong tag-iya sa Prime Water aron personal nga susihon ang kahimtang sa water system sa syudad.
Photo Courtesy: Malaybalay City
